Anti Dwynwen ydw i ac ‘rwy’n byw yn Nefyn gyda Bryn, fy ngŵr a’n tri o blant, Guto, Siwan a Nel – heb anghofio Ned y ci. ‘Rwy’n eithaf newydd i faes gofal plant, ac yn gweithio mewn Cylch Meithrin ers 7 mlynedd. Cyn hynna’n roeddwn yn gweithio fel Cynorthwyydd Personol mewn Coleg Addysg Bellach. Tra’n gweithio fel Arweinydd, ‘rwyf wedi cwblhau cwrs Diploma Lefel 3 a Lefel 5 mewn Gofal, Dysgu a Datblygiad Plant (Rheoli). Byddaf yn mynychu sawl cwrs sydd yn cael eu cynnig i ni fel ymarferwyr gofal plant, megis Makaton, Elklan yn ogystal â hyfforddiant diweddaraf ar ADY, Datblygu Plant a Galluogi Oedolion.

Rwy’n hoff o gerdded y ci ar draeth Nefyn ac o gwmpas llwybrau Mynydd Nefyn. Rwyf wrth fy modd mynd dramor gyda’r teulu, pan ‘da ni’n cael y cyfle. Byddem yn mwynhau dod at ein gilydd fel teulu estynedig i ddathlu penblwyddi, cawn fwynhau bwyd cartref a gemau i ddiddanu. Mae teulu’n bwysig iawn i mi. Rwyf wrth fy modd yn garddio ac yn cael boddhad o dyfu blodau o hadau. Mae garddio yn ffordd i mi ymlacio, coelioch neu beidio!

Dwi wrth fy modd yn gweithio gyda phlant oed cyn-ysgol. Mae gallu gweld eu datblygiad yn bleser a temlaf falchder wrth sylweddoli fy mod yn gwneud gwahaniaeth ym mywyd plentyn.

Helo, Anti Bethan ydw i. ‘Rwy’n byw yn Nefyn gyda fy ngŵr Iwan a tri o blant, Hana, Tomi a Megan. ‘Rwyf wedi gweithio gyda plant ers gadael y coleg gyda merit mewn Iechyd a Gofal Cymdeithasol. Es ymlaen i weithio yn Meithrinfa St Joseph’s yng Nghaernarfon ac yna ymlaen wedyn i Gamau Cyntaf.

Ar ôl genedigaeth fy ail plentyn, penderfynais aros adra am ychydig flynyddoedd i fagu fy nheulu bach.

Dechreuais fy swydd yn Cylch Meithrin Nefyn yn 2016. Ers hynny, rwyf wedi llwyddo i wneud sawl cwrs, gan gynnwys NVQ Lefel 3. Rwyf wedi mwynhau cwblhau cwrs Dyfarniad Lefel 3 NCFE mewn Pontio i Waith Chwarae yn ogystal â chyrsiau cyfoes fel Makaton, Datblygiad Plentyn a Galluogi Oedolion. Mae’r cyrsiau yma wedi fy helpu i gael y sgiliau mwyaf perthnasol a chyfoes. Wrth drosglwyddo’r wybodaeth a’i ddefnyddio i’r plant yn ein gofal, mae’n rhoi pleser pur i mi i’w gweld yn datblygu.

I gario ymlaen gyda fy natblygiad personol, buaswn yn hoffi cwblhau cwrs ‘Ysgol Goedwig’. ‘Dwi’n siwr bysa’r plant yn cael gymaint o fudd o hyn. Byddent yn datblygu hyder a hunan-barch trwy brofiadau ymarferol mewn lleoliad naturiol.

Helo, fy enw i yw Karen ac rwy'n dod o Swydd Stafford yn wreiddiol a symudais i Nefyn yn 1995. Rwyf bellach yn byw ym Morfa Nefyn gyda fy ngŵr a dau o fy nhri o blant, sydd wedi tyfu i fyny. Mae gen i ddwy wyres sy'n byw yn agos gyda fy merch hynaf a'i phartner. Rwy'n gofalu amdanynt yn rheolaidd er mwyn i'w rhieni allu gweithio eu patrwm sifft afreolaidd.

Cyn dechrau gweithio yn y cylch, roeddwn yn aros gartref pan oedd fy mhlant yn fach. Dechreuais weithio yng Nghylch Meithrin Nefyn ar ddiwedd 2004. Ers hynny rwyf wedi cyflawni NVQ Lefel 2 mewn Gofal, Dysgu a Datblygiad Plant, Diploma Lefel 3 CACHE mewn Gofal ac Addysg Blynyddoedd Cynnar a Diploma Lefel 5 City & Guilds mewn Arweinyddiaeth ar gyfer Gofal Plant , Dysgu a Datblygu (Rheoli). Rwy'n mynychu cyrsiau yn ôl yr angen i hyrwyddo fy natblygiad proffesiynol parhaus.

Pan fydd gennyf amser, rwy'n hoffi darllen a gwnïo croes-bwyth. Ar hyn o bryd, mae gen i sawl prosiect croes-bwyth ar y gweill, felly dwi ddim yn diflasu yn edrych ar yr un un drwy'r amser. Rwyf hefyd yn hoffi mynd allan ar fy mwrdd padlo i gael rhywfaint o amser tawel ar fy mhen fy hun.

Helo Anti Nat ydw i :) Dwi’n byw yn Nefyn gyda fy ngŵr Gwyn sy'n drydanwr, a’n plant Grace, Olivia ac Isabelle. Mae fy mhlant yn fy nghadw i'n hynod o brysur! Os nad ydw i’n dacsi Mam i wahanol ddigwyddiadau, gallwch ddod o hyd i mi wrth y cwrt pêl-rwyd neu’r stiwdio ddawns yn eu cefnogi nhw. Rydym wrth ein bodd yn teithio ac yn edrych ymlaen at ein gwyliau eleni. Pan ddaw’r cyfle, rwy’n mwynhau dal i fyny gyda fy ffrindiau efo paned yn yr ardd.

Rwyf wedi bod yn y rôl hon ers dros 10 mlynedd a gyda cymhwyster NVQ lefel 3. Rwy’n ymfalchïo bod yn ymarferydd cymwys cyfoes sydd wedi cwblhau hyfforddiant yn ddiweddar mewn datblygiad plant a galluogi oedolion i chwarae. Rydw i bob amser yn chwilio am ffyrdd newydd o ddatblygu cyfleoedd ddysgu i’r plant. Edrychaf ymlaen at gofrestru ar y cwrs ‘transition to playwork’ yn y dyfodol.

Cyn hyn, bûm yn gweithio yn y sector anabledd dysgu yn y GIG ond yn teimlo bod gweithio yn y feithrinfa yn fwy addas i'n teulu ni. Rwy’n gymwys yn Makaton ac yn mwynhau cefnogi’r plant i ddatblygu eu dealltwriaeth o arwyddo. Un o fy hoff bethau i'w wneud yw dweud jôcs a gwneud i'r plant wenu. Does dim byd dwi’n ei garu fwy na chlywed y plant yn chwerthin ac yn disgleirio yn ein gofal.

Anti Nia ydw i ac rwyf yn wreiddiol o Nefyn ac ers sawl blwyddyn bellach rwyf wedi mudo o’r ardal ac wedi priodi a magu teulu. Rwyf erbyn hyn yn byw yn Llithfaen gyda fy ngŵr Siôn a dwy o genod Beca ac Ela.

Ers gadael Coleg Meirion Dwyfor rwyf wedi bod yn gweithio men ysgolion cynradd fel cymhorthydd dosbarth yna yn Meithrinfa Dwylo Da ym Mhenygroes fel gweinyddes feithrin ac is-rheolydd.

Astudiais gwrs NVQ Lefel 3 mewn ‘Blynyddoedd Cynnar a Datblygiad’ yng Nholeg Meirion Dwyfor ac wedi llwyddo i gael cymhwyster NVQ Lefel 4 tra yn gweithio yn Dwylo Da.

Rwyf wedi bod yn gweithio yn Cylch Meithrin Nefyn ers dwy flynadd ac yn ei fwynhau yn fawr iawn.

Tu allan i’r gwaith rwyf yn mwynhau cerdded a gweithgareddau tu allan. Fy hoff lefydd i fynd yw top Nant Gwrtheyrn, Mynydd Gwaith a Tre’r Ceiri (mynyddoedd Yr Eifl), yn enwedig ar ddiwrnod braf!

Diddordebau eraill yw gwaith celf a gwylio sioeau cerdd a chomedi.